ພະແນກສຶກສາທິການ ແລະ ກິລາແຂວງສະຫວັນນະເຂດ

ມູນນິທິມາຣຸເບນີ ມອບຊຸດເຄື່ອງແບບນັກຮຽນ ອຸປະກອນການຮຽນໃຫ້ໂຮງຮຽນ 2 ແຫ່ງທີ່ ແຂວງສະຫວັນນະເຂດ ລວມມູນຄ່າ 159 ລ້ານກວ່າກີບ

  ມູນນິທິມາຣຸເບນີ ເພື່ອສົ່ງເສີມການສຶກສາຢູ່ ສປປ ລາວ (ມມສລ) ໄດ້ດຳເນີນການຊ່ວຍເຫຼືອ ນັກຮຽນຊົນເຜົ່າ ຢູ່ແຂວງສະຫວັນນະເຂດ ເປັນປີທີ 9 ແລ້ວ, ເຊິ່ງໃນປີນີ້ທາງ ມູນນິທິມາຣຸເບນີ ໄດ້ຊ່ວຍເຫຼືອຊຸດເຄື່ອງແບບນັກຮຽນ ເເລະ ອຸປະກອນການຮຽນ ເຊິ່ງລວມມີ ໂສ້ງ ເສື້ອ ສີ້ນ ປື້ມ ບິກແລະສໍດໍາ ຈຳນວນນຶ່ງ ມອບໃຫ້ 2 ໂຮງຮຽນຄື: ໂຮງຮຽນສາມັນກິນນອນຊົນເຜົ່າ ເມືອງເຊໂປນ ແລະ ໂຮງຮຽນສາມັນກິນນອນຊົນເຜົ່າ ເມືອງໄກສອນ ພົມວິຫານ ລວມມູນຄ່າທັງໝົດ 159,160,200 ກີບ.

  ພິທີມອບ-ຮັບເຄື່ອງຊ່ວຍເຫຼືອດັ່ງກ່າວໄດ້ມີຂຶ້ນ ໃນວັນທີ 19 ກັນຍາ ຜ່ານມາທີ່ຫ້ອງປະຊຸມໃຫຍ່ ຂອງໂຮງຮຽນ ສາມັນກິນນອນຊົນເຜົ່າ ເມືອງໄກສອນ ພົມວິຫານ ໃຫ້ກຽດມອບ ໂດຍ ທ່ານ ຮີໂຣໂຕະ ນິຊິກາກິ (Mr. HIROTO NISHIGAKI) ຄະນະບໍລິຫານງານ ມູນນິທິມາຣຸເບນີ ສົ່ງເສີມການສຶກສາຢູ່ ສປປ ລາວ (ມມສລ) ແລະ ຜູ້ຈັດການບໍລິສັດ ມາຣຸເບນີ ອາຊຽນປະຈຳຢູ່ ນະຄອນຫຼວງວຽງຈັນ ກ່າວຮັບໂດຍ ທ່ານ ສົມລິດ ອຸ່ນທະວີ ຜູ້ອຳນວຍການ ໂຮງຮຽນສາມັນກິນນອນ ຊົນເຜົ່າເມືອງໄກສອນພົມວິຫານ , ເຂົ້າຮ່ວມເປັນປະທານ ໂດຍທ່ານ ບົວລານ ສີລິປັນຍາ ຮອງລັດຖະມົນຕີ ກະຊວງສຶກສາທິການ ແລະກິລາ, ທ່ານ ພູຂົງ ນາມມະຈັກ ຫົວໜ້າຫ້ອງວ່າການປົກຄອງແຂວງສະຫວັນນະເຂດ, ມີບັນດາທ່ານຮອງ ພະແນກສຶກສາ-ກິລາແຂວງ ພະແນກການທີ່ກ່ຽວຂ້ອງ ແລະ ພະນັກງານຄູ-ອາຈານ ພ້ອມດ້ວຍນ້ອງນັກຮຽນເຂົ້າຮ່ວມ.

  ໃນພິທີ ທ່ານ ຮີໂຣໂຕະ ນິຊິກາກິ (Mr: HIROTO NISHIGAKI) ຄະນະບໍລິຫານງານ ມູນນິທິມາຣຸເບນີ ສົ່ງເສີມການສຶກສາຢູ່ ສປປ ລາວ(ມມສລ) ທັງເປັນ ຜູ້ຈັດການບໍລິສັດ ມາຣຸເບນີ ອາຊຽນປະຈຳຢູ່ ທີ່ວຽງຈັນ ກ່າວໃຫ້ຮູ້ວ່າ: ເນື່ອງໃນໂອກາດສະເຫຼີມສະຫຼອງ ການສ້າງຕັ້ງບໍລິສັດມາຣຸເບນີ ຄົບຮອບ 150 ປີ (1858-2008) ຄະນະບໍລິຫານງານຂັ້ນສູງຂອງບໍລິສັດ ໄດ້ສະເໜີຂໍສ້າງຕັ້ງມູນນິທິຂຶ້ນນຳລັດຖະບານແຫ່ງ ສປປ ລາວ ທີ່ມີຊື່ວ່າ: “ມູນນິທິມາຣຸເບນີເພື່ອສົ່ງເສີມການສຶກສາຢູ່ ສປປ ລາວ” ຄຳສະເໜີຂອງບໍລິສັດດັ່ງກ່າວໄດ້ຮັບການເຫັນດີ ຈາກຫ້ອງການສຳນັກງານນາຍົກລັດຖະມົນຕີ ສະບັບເລກທີ 1729/ຄລບ, ລົງວັນທີ 16/10/2007 ໃຫ້ຮັບຮອງເອົາກອງທຶນ ຂອງມູນນິທິມາຣຸເບນີ ແລະ ເຫັນດີອະນຸມັດໃຫ້ກະຊວງສຶກສາທິການ ແລະ ກິລາ ຮັບເອົາກອງທຶນສະໜັບສະໜູນການສຶກສາຈາກບໍລິສັດມາຣຸເບນີ ໂດຍການເຊັນບົດບັນທຶກຄວາມເຂົ້າໃຈ (MOU) ໃນວັນທີ 31 ຕຸລາ 2007 ລະຫວ່າງຜູ້ຕາງໜ້າກະຊວງສຶກສາທິການ ແລະ ກິລາ ແລະ ບໍລິສັດມາຣຸເບນີ ຊຶ່ງທັງສອງຝ່າຍຕົກລົງເຫັນດີນຳໃຊ້ເງິນດອກເບ້ຍກອງທຶນ ຈຳນວນ 200,000 ໂດລາສະຫາລັດ ທີ່ທາງບໍລິສັດມາຣຸເບນີໄດ້ຝາກໄວ້ຢູ່ທະນາຄານພັດທະນາລາວ ເພື່ອນຳໄປຊື້ອຸປະກອນການຮຽນ ແລະ ຊຸດເຄື່ອງແບບນັກຮຽນ ໃຫ້ແກ່ນັກຮຽນຊົນເຜົ່າ ເມືອງເຊໂປນ ແລະ ນັກຮຽນຊົນເຜົ່າ ເມືອງໄກສອນ ພົມວິຫານ ແຂວງສະຫວັນນະເຂດ ເຊິ່ງການຊ່ວຍເຫຼືອ ມີກຳນົດຊ່ວຍເຫຼືອເປັນເວລາ 20 ປີ (2008-2027). ສຳລັບປີນີ້ເປັນປີທີ 9 ທີ່ທາງ ມູນນິທິມາຣຸເບນີ ໄດ້ໃຫ້ການຊ່ວຍເຫຼືອ 2 ໂຮງຮຽນຊົນເຜົ່າ ຢູ່ແຂວງສະຫວັນນະເຂດ ເຊິ່ງມີນັກຮຽນທັງໝົດ 909 ຄົນ ຄື: ໂຮງຮຽນສາມັນກິນນອນຊົນເຜົ່າ ເມືອງເຊໂປນ ມີຈຳນວນນັກຮຽນທັງໝົດ 462 ຄົນ ແລະ ໂຮງຮຽນສາມັນກິນນອນຊົນເຜົ່າ ເມືອງໄກສອນ ພົມວິຫານ ຈຳນວນ 447 ຄົນ ເຊິ່ງໄດ້ແບ່ງຕາມຈຳນວນນັກຮຽນໃນແຕ່ລະ ໂຮງຮຽນ ລວມມູນຄ່າການຊ່ວຍເຫຼືອໃນປີນີ້ມີທັງໝົດ 159,160,200 ກີບ, ຖ້າລວມເງິນຊ່ວຍເຫຼືອທັງ 9 ປີ ເປັນຈຳນວນເງິນທັງໝົດ 1,841,432,400 ກີບ (ໜຶ່ງພັນແປດຮ້ອຍສີ່ສິບເອັດລ້ານ ສີ່ແສນສາມສິບສອງພັນ ສີ່ຮ້ອຍກີບ). ສະນັ້ນ, ມູນນິທິມາຣຸເບນີ ເພື່ອສົ່ງການສຶກສາ ຢູ່ ສປປ ລາວ ເປັນອົງການຈັດຕັ້ງປະສົມຮ່ວມມືລະຫວ່າງລັດ ແລະບໍລິສັດເອກະຊົນ ຍີ່ປຸ່ນ ທີ່ນຳໜ້າການເຄື່ອນໄຫວວຽກງານການກຸສົນ ພາຍໃຕ້ກົດ ໝາຍຂອງ ສປປ ລາວ, ເຊິ່ງມີຈຸດປະສົງ ເພື່ອສະໜອງທຶນການສຶກສາປະຈຳປີ, ສົມທົບທຶນຊ່ວຍເຫຼືອ ແລະ ການຊ່ວຍເຫຼືອໃນຮູບແບບຕ່າງໆ ທີ່ເປັນປະໂຫຍດແກ່ນັກຮຽນ ແລະ ນັກສຶກສາລາວ, ສະໜອງທຶນການຊ່ວຍເຫຼືອໃຫ້ແກ່ປະຊາຊົນບັນດາເຜົ່າທີ່ດ້ອຍໂອກາດ ໃຫ້ໄດ້ຮັບການສຶກສາ.

  ໂອກາດດັ່ງກ່າວ, ທ່ານ ວິໄນ ສຸຂະລາດ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ກໍ່ໄດ້ມອບໃບຍ້ອງຍໍ ໃຫ້ແກ່ມູນນິທິມາຣຸເບນີ ກ່າວຮັບໂດຍ ທ່ານ ຮີໂຣໂຕະ ນິຊິກາກິ.

 ໂດຍ: ພູວອນ ດຳລົງບຸນ