ພະແນກສຶກສາທິການ ແລະ ກິລາແຂວງສະຫວັນນະເຂດ

ຜົນງານຂອງ ທັບນັກກິລາ ສະຫວັນນະເຂດ ໃນນົກກົກຄຳເກມ

  ການດຳເນີນ ການແຂ່ງຂັນ ໃນງານມະຫາກຳ ກິລານັກຮຽນ ທົ່ວປະເທດ ຄັ້ງທີ 16 ແຕ່ວັນທີ 27 ມັງກອນ ຜ່ານມາຮອດປັດຈຸບັນ ທັບນັກກິລາ ລູກຫຼານພໍ່ກະດວດ ດິນແດນໄດໂນເສົາ ແຂວງສະຫວັນນະເຂດ ຍາດໄດ້ 7 ຫຼຽນຄຳ, 7 ຫຼຽນເງິນ ແລະ 10 ຫຼຽນທອງ ຈາກກິລາ 6 ປະເພດ ຈັດຢູ່ ອັນດັບທີ 5 ຂອງຕາຕາລາງຫຼຽນ.

  ໃນການແຂ່ງຂັນ ງານມະຫາກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳເກມ ທີ່ແຂວງບໍລິຄຳໄຊ ເປັນເຈົ້າພາບ ສະເພາະ 7 ຫຼຽນຄຳ ທີ່ແຂວງສະຫວັນນະເຂດ ໄດ້ຮັບແມ່ນຈາກ ກິລາກະຕໍ້ ດ່ຽວທີມຊາຍ, ກະຕໍ້ຄູ່ (ຊາຍ-ຍິງ), ເປຕັງຄູ່ ຊາຍ, ແລ່ນ 100 ແມັດ ຊາຍ-ຍິງ ແລະ ຍ່າງ 5 ພັນແມັດຊາຍ. ສຳລັບ ວັນທີ 5 ກຸມພາ 2017 ແຂວງສະຫວັນນະເຂດ ມີກິລາລົງຊີງ ຫຼຽນຄຳ 12 ຫຼຽນຄື: ກິລາແລ່ນ-ລານ 5 ລາຍການ, ເປຕັງ 1 ລາຍການ, ເທຄວັນໂດ 4 ລາຍການ ແລະ ໜ້າເກັກ 2 ລາຍການ ເຊິ່ງກິລາທີກຳລັງແຂ່ງຂັນຢູ່ມີ ບານເຕະຍິງ ຮອບຮອງຊະນະເລີດພົບກັບ ນະຄອນຫຼວງວຽງຈັນ ເວລາ 16:00 ນາທີ, ບານເຕະຊາຍ ຮອບຮອງຊະນະເລີດ ພົບກັບແຂວງຫຼວງພະບາງ, ແລ່ນ-ລານ 10 ລາຍການ, ກິລາກະຕໍ້ທີມຊຸດ ຊາຍ-ຍິງ, ເປຕັງ 3 ລາຍການ, ບານສົ່ງຫາດຊາຍ (ຊາຍ-ຍິງ) ເຂົ້າຮອບຮອງຊະນະເລີດ, ບານສົ່ງໃນຮົ່ມ (ຊາຍ-ຍິງ) ເຂົ້າຮອບຮອງຊະນະເລີດ, ກິລາບານບ້ວງ(ຊາຍ-ຍິງ) ແລະ ກິລາດອກປີກໄກ່ 2 ລາຍການ.

  ເຫັນໄດ້ວ່າ ສະຫວັນນະເຂດ ກໍ່ເປັນແຂວງໜຶ່ງ ທີ່ມີຜົນງານອັນໂດດເດັ່ນ ໃນການແຂ່ງຂັນຄັ້ງນີ້ ແລະ ເຮົາມາຮ່ວມຕິດຕາມ ຜົນງານຂອງເຫຼົ່ານັກກິລາ ແດນໄດໂນເສົາ ນຳກັນວ່າຈະເປັນແນວໃດຕໍ່ໄປ.

 

 ໂດຍ: ພູວອນ ດຳລົງບຸນ