ພະແນກສຶກສາທິການ ແລະ ກິລາແຂວງສະຫວັນນະເຂດ

ທ່ານຮອງເຈົ້າແຂວງລົງຢ້ຽມຢາມ 5 ໂຮງຮຽນເຂດບ້ານຄຳປ່າແໜ ເມືອງຈຳພອນ

  ທ່ານຮອງເຈົ້າແຂວງສະຫວັນນະເຂດ ໄດ້ລົງຢ້ຽມຢາມ 5 ໂຮງຮຽນ ເຂດບ້ານຄຳປ່າແໜ ເມືອງຈຳພອນ ແຂວງສະຫວັນນະເຂດຄື: ໂຮງຮຽນ ປະຖົມບ້ານຄຳປ່າແໜ, ປະຖົມຄຳຕ໋ອງລ໋ອງ, ປະຖົມປ່າກ້ວຍ, ປະຖົມກະຫຼາງ ແລະ ມຕ ກະຫຼາງ ພ້ອມທັງມອບອຸປະກອນການຮຽນໃຫ້ແຕ່ລະໂຮງຮຽນມູນຄ່າ 5 ລ້ານກີບ. ການລົງຢ້ຽມຢາມດັ່ງກ່າວໄດ້ມີຂຶ້ນ ໃນວັນທີ 23 ມີນາ ຜ່ານມາທີ່ໂຮງຮຽນປະຖົມບ້ານຄຳປ່າແໜ ເມືອງຈຳພອນ ແຂວງສະຫວັນນະເຂດ ໂດຍ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ພ້ອມດ້ວຍທີມງານ ມີບັນດາທ່ານຕ່າງໜ້າກຸ່ມວັດທະນະທຳສັງຄົມ, ພ້ອມດ້ວຍພະນັກງານ, ຄູ - ນັກຮຽນ ແລະ ພໍ່ແມ່ປະຊາຊົນເຂົ້າຮ່ວມ.

  ການລົງຢ້ຽມຢາມໃນຄັ້ງນີ້ແມ່ນໄດ້ຈັດໃຫ້ມີການແຂ່ງຂັນກິລາຫຼາຍປະເພດຄື: ກິລາດຶງເຊືອກ (ຊາຍ-ຍິງ), ແລ່ນຄາບບ່ວງໃສ່ໄຂ່ (ຊາຍຍິງ), ກິລາຊ່ວງເຮືອບົກ ແລະ ກິລາຕີ໋ກ໋ອບພື້ນບ້ານ, ນອກນີ້ ຍັງມີການສະແດງບົດຟ້ອນຂອງນ້ອງນັກຮຽນ 5ໂຮງຮຽນ ໂອກາດດັ່ງກ່າວ ທ່ານຮອງເຈົ້າແຂວງກໍ່ໄດ້ມອບອຸປະກອນການຮຽນ ແລະ ອຸປະກອນກິລາຈຳນວນໜຶ່ງຄື: ປື້ມຂຽນ 100 ໜ້າ, ບິກ, ສໍດຳ, ແຜ່ນທີ່, ໝາກບານ, ກະຕໍ້, ບານສົ່ງ, ຕາໜ່າງບານສົ່ງ ແລະ ຕາໜ່າງກະຕໍ້ ມອບໃຫ້ໂຮງຮຽນລະ 1 ຊຸດລວມມູນຄ່າທັງໝົດ 5 ລ້ານກີບ.

  ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ກ່າວໃຫ້ຮູ້ວ່າ: ເປັນການປະຕິບັດຕາມທິດທາງລວມຂອງແຂວງວາງອອກ ໃນການລົງຢ້ຽມຢາມຄັ້ງນີ້ ສຳລັບພະແນກສຶກສາ-ກິລາແຂວງພວກເຮົາແມ່ນຮັບຜິດຊອບການຈັດກິດຈະກຳແຂ່ງຂັນກິລາ-ສິລະປະ ໃຫ້ໂຮງຮຽນ 5 ແຫ່ງຄື: ໂຮງຮຽນ ປະຖົມບ້ານຄຳປ່າແໜ, ປະຖົມຄຳຕ໋ອງລ໋ອງ, ປະຖົມປ່າກ້ວຍ, ປະຖົມກະຫຼາງ ແລະ ມຕ ກະຫຼາງ ເຂົ້າຮ່ວມແຂ່ງຂັນກິລາ-ສິລະປະເຊັ່ນ: ກິລາດຶງເຊືອກ, ກິລາຊ່ວງເຮືອບົກ, ກິລາຄາບບ່ວງໃສ່ໄຂ່ ແລະ ກິລາຕີ່ກ໋ອບຊາວບ້ານ (ຊາຍ-ຍິງ), ເຊິ່ງເປັນການເລີ່ມຕົ້ນຂອງໂຄງການດັ່ງກ່າວ, ເພື່ອສືບຕໍ່ແຂ່ງຂັນໃນລະດັບເມືອງ ແລະ ລະດັບແຂວງໃນຂັ້ນຕໍ່ໄປ, ເຮັດໃຫ້ວຽກງານກິລາ-ສິລະປະວັນນະຄະດີ ແຕ່ລະໂຮງຮຽນ ໄດ້ມີການເຄື່ອນໄຫວເປັນປະຈຳ, ພ້ອມເຮັດໃຫ້ນັກຮຽນໃຊ້ເວລາວາງໃຫ້ເກີດປະໂຫຍດ ເພື່ອຕ້ານປາກົດການຫຍໍ້ທໍ້ໃນໂຮງຮຽນ ແລະ ເພື່ອສົ່ງເສີມໂຮງຮຽນໃຫ້ທຸກໂຮງຮຽນ ທົ່ວແຂວງ ປະຕິບັດໄດ້ 3 ຂໍ້ແຂ່ງຂັນຂອງກະຊວງສຶກສາທິການ ແລະ ກິລາວາງອອກໃຫ້ປາກົດຜົນເປັນຈິງ.

  ພ້ອມນັ້ນ, ທ່ານ ໜໍບຸນເພັງ ວໍລະຈັກ ຮອງຫ້ອງການສາທາລະນະສຸກເມືອງຈຳພອນ ກໍ່ໄດ້ກ່າວໃຫ້ຮູ້ວ່າ: ການລົງກວດພະຍາດຟີໃຫ້ແກ່ພໍ່-ແມ່ປະຊາຊົນ ແລະ ເດັກນ້ອຍພາຍໃນເຂດບ້ານຄຳປ່າແໜ ສະເພາະແມ່ນ ກວດພະບາດທົ່ວໄປ, ກວດທ້ອງແມ່ຍິງຖືພາ ເພື່ອກວດເບິ່ງການຈະເລີນເຕີບໂຕຂອງເດັກໃນຄັນ ແລະ ກວດເບິ່ງການຈະເລີນເຕີບໂຕຂອງເດັກນ້ອຍອາຍຸບໍ່ເກີນ 5 ປີ, ກິດຈະກຳດັ່ງກ່າວແມ່ນເປັນຄັ້ງທຳອິດທີ່ໄດ້ລົງກວດສຸຂະພາບໃຫ້ພໍ່-ແມ່ປະຊາຊົນເຂດຫ່າງໄກສອກຫຼີກ ໂດຍສະເພາະແມ່ນການຈະເລີນເຕີບໂຕຂອງເດັກ ແລະ ໂຄງການລູກຫ່າງ ເພື່ອເຮັດໃຫ້ພໍ່-ແມ່ປະຊາຊົນເຂດບ້ານຄຳປ່າແໜ ໄດ້ຢູ່ດີກິນດີໃນຕໍ່ໜ້າ.

 ໂດຍ: ພູວອນ ດຳລົງບຸນ