ພະແນກສຶກສາທິການ ແລະ ກິລາແຂວງສະຫວັນນະເຂດ

ສກຂ ຊະນະ ທີມຢັງຢາຍ ຢູໄນເຕັດ 4-2 ປະຕູ ເຕະບານຂ່ຳນັບຮັບຕ້ອນວັນກຳມະກອນສາກົນຄົບຮອບ 131 ປີ

  ທີມພະແນກສຶກສາທິການ ແລະ ກິລາແຂວງສະຫວັນນະເຂດ ເອົາຊະນະ ທີມຢັງຢາຍຢູໄນເຕັດ 4-2 ປະຕູ, ແຂ່ງຂັນເຕະບານມິດຕະພາບ ເພື່ອຂ່ຳນັບຮັບຕ້ອນວັນກຳມະກອນສາກົນຄົບຮອບ 131 ປີ (1 ພຶດສະພາ 1886 - 1 ພຶດສະພາ 2017) ພ້ອມນັ້ນ ບໍລິສັດ ເທບທອງຄຳກໍ່ສ້າງຍັງໄດ້ມອບ ເຄື່ອງກິລາຈຳນວນ 20 ຊຸດ ມູນຄ່າ 1 ລ້ານກີບ ໃຫ້ພະແນກສຶກສາ-ກິລາແຂວງສະຫວັນນະເຂດ.

  ການແຂ່ງຂັນເຕະບານມິດຕະພາບ ລະຫວ່າງພະແນກສຶກສາທິການ ແລະກິລາແຂວງສະຫວັນນະເຂດ ແລະ ທີມຢັງຢາຍຢູໄນເຕັດ ໄດ້ມີຂຶ້ນໃນວັນທີ 3 ພຶດສະພາ ຜ່ານມາທີ່ສະໜາມກິລາແຂວງສະຫວັນນະເຂດ (ສະໜາມກິລາຫຼັກ 4) ໂດຍໃຫ້ກຽດນຳທີມຂອງ ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະ, ມີບັນດາທ່ານຫົວໜ້າຫ້ອງສຶກສາທິການ ແລະ ກິລາເມືອງ 15 ເມືອງ ພ້ອມຄະນະນັກສຳມະນາກອນ ແລະ ພະນັກງານຫ້ອງການ ເຂົ້າຮ່ວມຢ່າງເປັນຂະບວນຟົດຟື້ນ.

  ການຈັດການແຂ່ງຂັນເຕະບານມິດຕະພາບຄັ້ງນີ້ ເພື່ອສ້າງຂະບວນການຂ່ຳນັບຮັບຕ້ອນ ວັນກຳມະກອນສາກົນຄົບຮອບ 131 ປີ (1 ພຶດສາພາ 1886 - ຢ 1 ພຶດສະພາ 2017) ພ້ອມທັງເປັນການອອກກຳລັງກາຍຮ່ວມກັນ ໂດຍເອົາກິລາເປັນສື່ກາງຄວາມສາມັກຄີ ເຮັດໃຫ້ສຸຂະພາບແຂງແຮງກຽມພ້ອມຮັບວຽກງານ ສຳລັບ ຜົນການແຂ່ງຂັນປາກົດວ່າ: ທີມພະແນກສຶກສາທິການ ແລະ ກິລາແຂວງສະຫວັນນະເຂດ ເອົາຊະນະ ທີມຢັງຢາຍຢູໄນເຕັດ ໄປດ້ວຍສະກໍ 4-2 ປະຕູ. ໃນໂອກາດດຽວກັນນີ້ ທ່ານ ແຫວນວົງຄຳ ເຕັມສຸລິວັນ ປະທານບໍລິສັດ ເທບທອງຄຳກໍ່ສ້າງຍັງໄດ້ມອບ ເຄື່ອງກິລາຈຳນວນ 20 ຊຸດ ມູນຄ່າ 1 ລ້ານກີບ ໃຫ້ພະແນກສຶກສາ-ກິລາແຂວງສະຫວັນນະເຂດ.

 

 ໂດຍ: ພູວອນ ດຳລົງບຸນ