ພະແນກສຶກສາທິການ ແລະ ກິລາແຂວງສະຫວັນນະເຂດ

ສູນສະຫວັນເຊັນເຕີ ຍັງສືບຕໍ່ໃຫ້ການຊ່ວຍເຫຼືອພັດທະນາທັກສະໄວໜຸ່ມ ຢູ່ແຂວງສະຫວັນນະເຂດ

  ໂຄງການສູນພັດທະນາທັກສະໄວໜຸ່ມແຂວງສະຫວັນນະເຂດ (ສູນສະຫວັນເຊັນເຕີ) ແລະ ພະແນກສຶກສາທິການ ແລະ ກິລາແຂວງສະຫວັນນະເຂດ ເຊັນບົດບັນທຶກຄວາມເຂົ້າໃຈ ເພື່ອໃຫ້ໄວໜຸ່ມລາວ ກໍ່ຄືນັກຮຽນທີ່ແຂວງສະຫວັນນະເຂດ ມີຄວາມອາດສາມາດເພີ່ມຂຶ້ນໃນການຕັດສິນໃຈເລືອກສິ່ງທີ່ດີກັບຊີວິດ ໂດຍເລັ່ງໃສ່ 4 ໂຮງຮຽນເປົ້າໝາຍຂອງແຂວງ ໂດຍໃຫ້ການສະໜັນສະໜູນທຶນຈາກ fida ພິທີດັ່ງກ່າວໄດ້ມີຂຶ້ນໃນວັນທີ 9 ພຶດສະພາ ຜ່ານມາທີ່ຫ້ອງປະຊຸມຂອງ ສູນສະຫວັນເຊັນເຕີເອງ ເຊິ່ງຝ່າຍພະແນກສຶກສາ-ກິລາແຂວງ ມີທ່ານ ຖາວອນ ອິນສີຊຽງໃໝ່ຮອງຫົວໜ້າພະແນກສຶກສາ-ກິລາ ພ້ອນຄະນະ ແລະ ຝ່າຍສູນສະຫວັນເຊັນເຕີ ມີທ່ານ ນາງ ໄປວີ ໂຢກິວູໂອລິ ຫົວໜ້າອົງການສະພາພະເຈົ້າ ໂດຍເຂົ້າຮ່ວມເປັນສັກຂີ່ພິຍານຂອງ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ມີຮອງເຈົ້າເມືອງ ໄກສອນພົມວິຫານ, ບັນດາທ່ານຕ່າງໜ້າພະແນກການທີ່ກ່ຽວຂ້ອງ ພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມ.

  ທ່ານ ນາງ ໄປວີ ໂຢກິວູໂອລິ ໄດ້ກ່າວໃຫ້ຮູ້ວ່າ: ໂຄງການສູນພັດທະນາທັກສະໄວໜຸ່ມແຂວງສະຫວັນນະເຂດຖືກຮັບຮອງ ແລະ ລົງລາຍເຊັນລະຫວ່າງອົງການສະພາພະເຈົ້າ ກັບ ກະຊວງສຶກສາທິການ ແລະ ກິລາ ເຊິ່ງຕ່າງໜ້າໂດຍ ພະແນກສຶກສາທິການ ແລະ ກິລາ ຄັ້ງວັນທີ 18 ເດືອນ ທັນວາ 2013 (ໄລຍະເວລາຂອງໂຄງການແມ່ນເລີ່ມແຕ່ 2013 ຫາ 2016. ຈຸດປະສົງເພື່ອໃຫ້ໄວໜຸ່ມນັກຮຽນທີ່ແຂວງສະຫວັນນະເຂດ ມີສຸຂະພາບແຂງແຮງ ແລະ ສົມບູນ ໂດຍໄລຍະທຳອິດແມ່ນໄດ້ຂະຫຍາຍກິດຈະກຳລົງສູ່ໂຮງຮຽນເປົ້າໝາຍ 4 ແຫ່ງຄື: ມສ ສະຫວັນ, ມສ ອຸດົມວິໄລ, ມປ ໂພນສະຫວັນ ແລະ ມຕ ສຸນັນທາ. ສຳລັບແຜນການຂອງສູນໄລຍະ 2 ແມ່ນແນ່ໃສ່ໄວໜຸ່ມນັກຮຽນທີ່ແຂວງສະຫວັນນະເຂດ ມີສຸຂະພາບແຂງແຮງ ແລະ ມີຈິດໃຈທີ່ເຂັ້ມແຂງ ໂດຍການສ້າງຄະນະພັດທະນາໃນແຕ່ລະໂຮງຮຽນເປົ້າໝາຍ ແລະ ສູນພັດທະນາທັກສະໄວໜຸ່ມ ແລະ ຈັດໃຫ້ມີການຝຶກອົມຮົມໃນວຽກງານພັດທະນາຢ່າງເປັນປະຈຳ, ປັບປຸງທັກສະຊີວິດຂອງໄວໜຸ່ມໂດຍການເຂົ້າຮ່ວມຝຶກອົບຮົມໃນຫຼັກສູດຕ່າງຕ່າງ ຊ່ວຍກະຕຸກຊຸກຍູ້ໃຫ້ໄວໜຸ່ມຍິງ-ຊາຍ ຄົ້ນພົບພອນສະຫວັນທີ່ຕົນເອງມີ ແລະ ສາມາດຕັ້ງເປົ້າໝາຍຂອງຊີວິດໃຫ້ຕົນເອງຜ່ານການຝຶກອົບຮົມ ໃນຫົວຂໍ້: ຫຼັກສູດ-ສະແຕັງ (Strength) ສ້າງຄວາມເຂັ້ມແຂງໃຫ້ໄວໜຸ່ມຊາຍ, ຫຼັກສູດ-ຊາຍໂຮບ (Shine Hope) ໃຫ້ຄຸນຄ່າ ແລະ ຄວາມຫວັງໃຫ້ໄວໜຸ່ມຍິງ ແລະ ສ້າງໃຫ້ໄວໜຸ່ມນັກຮຽນມີຄວາມຮູ້ຮອບຕົວຫຼາຍຂຶ້ນ, ມີຄວາມໝັ້ນໃຈ ແລະ ສາມາດຄົ້ນພົບພອນສະຫວັນຂອງຕົວເອງດີຂຶ້ນ, ເພື່ອຕ້ານປະກົດການຫຍໍ້ທໍ້ຂອງໄວໜຸ່ມທີ່ຂາດຄວາມສາມາດ, ບໍ່ກ້າສະແດງອອກ, ຂີ່ຄ້ານໃນການເຂົ້າຮ່ວມກິດຈຳກຳຕ່າງໆ. ເຊິ່ງໂຄງການດັ່ງກ່າວແມ່ນໄດ້ສືບຕໍ່ເປັນໄລຍະ 2 ແມ່ນຈັດຕັ້ງປະຕິບັດທີ່ເມືອງໄກສອນ ພົມວິຫານ ແຂວງສະຫວັນນະເຂດ ຢູ່ທີ່ສູນພັດທະນາທັກສະໄວໜຸ່ມ ຫຼື ສູນສະຫວັນເຊັນເຕີ ແລະ ໂຮງຮຽນເປົ້າໝາຍ 4 ແຫ່ງຄື: ມສ ສະຫວັນ, ມສ ອຸດົມວິໄລ, ມປ ໂພນສະຫວັນ ແລະ ມຕ ສຸນັນທາ ຮອດປີ 2020 ເຊິ່ງລວມງົບປະມານທັງໝົດທີ່ຈະໃຊ້ຈ່າຍກິດຈະກຳຂອງໂຄງການ ຈຳນວນ 280,000 ຢູໂລ.

  ຈາກນັ້ນ, ທັງສອງຝ່າຍກໍ່ໄດ້ຕົກລົງ ເຊັນບົດບັນທຶກຄວາມເຂົ້າໃຈ ລະຫວ່າງກະຊວງສຶກສາທິການ ແລະ ກິລາ ຕ່າງໜ້າໂດຍ ພະແນກສຶກສາ-ກິລາ ແຂວງສະຫວັນນະເຂດ ໂດຍ ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາ-ກິລາແຂວງ ແລະ ໂຄງການສູນພັດທະນາທັກສະໄວໜຸ່ມ ຫຼື ສູນສະຫວັນເຊັນເຕີ ນາງ ໄປວີ ໂຢກິວູໂອລິ ຫົວໜ້າອົງການສະພາພະເຈົ້າ

 

 ໂດຍ: ພູວອນ ດຳລົງບຸນ