ພະແນກສຶກສາທິການ ແລະ ກິລາແຂວງສະຫວັນນະເຂດ

ໂຄງການ CRS ມອບຍານພາຫະນະ 2 ຄັນໃຫ້ຫ້ອງການສຶກສາ-ກິລາເມືອງນອງ

  ໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າໂຮງຮຽນຊັ້ນປະຖົມສຶກສາ (CRS) ໄດ້ມອບລົກຈັກ 2 ຄັນ ໃຫ້ແກ່ຫ້ອງການສຶກສາທິການ ແລະ ກິລາເມືອງນອງ ແຂວງສະຫວັນນະເຂດ ເພື່ອຮັບໃຊ້ເຂົ້າໃນການລົງຕິດຕາມຊຸກໂຮງຮຽນຕ່າງໆ ຂອງໂຄງການ CRS ໄດ້ໃຫ້ການຊ່ວຍເຫຼືອ

  ພິທີມອບ-ຮັບຍານພາຫະນະ (ລົດຈັກ) ໄດ້ມີຂຶ້ນ ໃນວັນທີ 3 ຕຸລາ ຜ່ານມາທີ່ຫ້ອງປະຊຸມ ຂອງຫ້ອງການສຶກສາທິການ ແລະ ກິລາເມືອງນອງ ແຂວງສະຫວັນນະເຂດ ໃຫ້ກຽດມອບ ໂດຍທ່ານ ນາງ ເຈສຊິກ້າ ກ່າວຮັບໂດຍ ທ່ານ ສີອຸດອນ ທອງສຸວັນ ຮອງຫົວໜ້າພະແນກສຶກສາທິການ ແລະ ກິລາແຂວງ, ເຂົ້າຮ່ວມເປັນສັກຂີພິຍານໂດຍທ່ານ ບຸນຍົມ ນາວລາສີ ຮອງເຈົ້າເມືອງນອງ, ບັນດາທ່ານຄະນະຫ້ອງການສຶກສາ-ກິລາເມືອງ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ ໃນພິທີ ທ່ານນາງ ເຈສຊິກ້າ ອຳນວຍການໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າໂຮງຮຽນຊັ້ນປະຖົມສຶກສາ (CRS) ໄລຍະ 2 ໄດ້ກ່າວໃຫ້ຮູ້ວ່າ: ເພື່ອປັບປຸງການຮູ້ໜັງສື, ການຂຶ້ນຫ້ອງຮຽນ ແລະ ຄວາມຕັ້ງໃຈຂອງນັກຮຽນ, ອົງການ CRS ຈະສະໜັບສະໜູນອາຫານໃຫ້ແກ່ນັກຮຽນປະມານ 40 ພັນຄົນໃນທຸກມື້ເຂົ້າຮຽນ, ໂຄງການຍັງໄດ້ທົດລອງກິດຈະກຳ ດ້ານນ້ຳ, ສຸຂາພິບານ ແລະ ສຸຂະອະນາໄມ ໃນ 30 ໂຮງຮຽນ ໂດຍເລັງໃສ່ການປ່ຽນແປງພຶດຕິກຳ ແລະ ການປັບປຸງໂຄງສ້າງພື້ນຖານ. ສືບຕໍ່ຮ່ວມມືກັບມະຫາວິທະຍາໄລເຣກອນ (UO) ເພື່ອຝຶກຄູຝຶກ 20 ຄົນ ແລະ ຜູ້ອຳນວຍການ, ຄູ 180 ຄົນ ກ່ຽວກັບຍຸດທະສາດການສອນໃນຫ້ອງຮຽນ, ການຄຸ້ມຄອງ ແລະ ແຜນການສອນສຳລັບການສຶກສາຮຽນຮ່ວມ

  ສຳລັບການມອບລົດຈັກໃຫ້ຫ້ອງການສຶກສາທິການ ແລະ ກິລາເມືອງນອງໃນຄັ້ງນີ້ ໂດຍການຊ່ວຍເຫຼືອຈາກກະຊວງກະສິກຳ ສະຫາລັດອາເມລິກາ ເພື່ອຮັບໃຊ້ເຂົ້າໃນການລົງຕິດຕາມຊຸກຍູ້ໂຮງຮຽນຕ່າງໆ ຂອງໂຄງການ CRS ໄດ້ໃຫ້ການຊ່ວຍເຫຼືອ ໃຫ້ເດັກນ້ອຍທຸກຄົນໄດ້ເຂົ້າໂຮງຮຽນຊັ້ນປະຖົມສຶກສາຢ່າງທົ່ວເຖິງ ໂອກາດດັ່ງກ່າວ ທ່ານ ສີອຸດອນ ທອງສຸວັນ ໄດ້ກ່າວຂອບໃຈມາຍັງ ທ່ານຜູ້ອຳນວຍການໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າໂຮງຮຽນຊັ້ນປະຖົມສຶກສາ (CRS) ທີ່ໃຫ້ການສົ່ງເສີມການສຶກສາ ແຂວງສະຫວັນນະເຂດດ້ວຍດີຕະຫຼອດມາ, ເຮັດໃຫ້ເດັກທີ່ທຸກຍາກໄດ້ມີການສຶກສາຮ່ຳຮຽນເປັນຢ່າງທົ່ວເຖິງ. ທ່ານຍັງໄດ້ແນະນຳໃຫ້ຫ້ອງການສຶກສາທິການ ແລະ ກິລາເມືອງ ເອົາໃຈໃສ່ນຳໃຊ້ຍານພາຫະນະດັ່ງກ່າວໃຫ້ເກີດປະໂຫຍດສູງສຸດ, ຖືກກັບເປົ້າໝາຍຂອງໂຄງການທີ່ວາງໄວ້.

 

 ໂດຍ: ພູວອນ ດຳລົງບຸນ