ພະແນກສຶກສາທິການ ແລະ ກິລາແຂວງສະຫວັນນະເຂດ

ສກຂ ສະຫວັນນະເຂດຕີລາຄາຄືນວຽກງານໃນເດືອນ 9 ແລະວາງແຜນໃນເດືອນຕໍ່ໄປ

  ໃນວັນທີ 11 ຕຸລາ ຜ່ານມາທີ່ຫ້ອງປະຊຸມ ພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ມີກອງປະຊຸມປະຈຳເດືອນ ແລະ ວາງທິດທາງແຜນການໃນເດືອນຕໄປ ໂດຍເຂົ້າຮ່ວມເປັນປະທານຂອງ ທ່ານນາງ ຫຼິງທອງ ແສງຕາວັນ ຫົວໜ້າ ພະແນກສຶກສາ-ກິລາແຂວງ, ມີບັນດາທ່ານຫົວໜ້າຂະແໜງ, ຮອງຂະແໜງ,ສູນ ພ້ອມດ້ວຍພະນັກງານເຂົ້າຮ່ວມຢ່າງພ້ອມພຽງ.

  ທ່ານນາງ ບົວວັນ ສຸວໍລະວົງ ຫົວໜ້າຫ້ອງການບໍລິຫານ ສກຂ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານໃນເດືອນກັນຍາຜ່ານມາ ແລະ ວາງແຜນທິດທາງແຜນການໃນເດືອນຕໍ່ໄປໃຫ້ຮູ້ວ່າ: ພະແນກສຶກສາທິການ ແລະ ກິລາແຂວງ ປະກອບມີ 12 ຂະແໜງ, ມີພະນັກງານທັງໝົດ 85 ທ່ານ, ຍິງ 31 ທ່ານ, ສັນຍາຈ້າງ 4 ຄົນ, ຍິງ 1 ຄົນ, ມີ 4 ສູນ ແລະ 10 ໂຮງຮຽນຂຶ້ນກັບນັບທັງພາກລັດ ແລະ ເອກະຊົນ ໃນເດືອນ 1 ຜ່ານມາໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ຂອງພະນັກງານຄູ-ອາຈານ, ນັກຮຽນນັກສຶກສາດ້ວຍຫຼາຍຮູບແບບ ແຕ່ລະຄົນແມ່ນມີແນວຄິດຫຼັກໝັ້ນການເມືອງໜັກແໜ້ນ ປະຕິບັດຕາມແນວທາງນະໂຍບາຍຂອງພັກ ແລະ ລັດຢ່າງຖືກຕ້ອງ ສະແດງອອກໃນການເຮັດວຽກວິຊາສະເພາະ ນຳໃຊ້ເຂົ້າໃນການປະຕິບັດໜ້າທີ່ການສິດສອນເປັນຢ່າງດີ, ມີຄວາມຮັບຜິດຊອບຕໍ່ໜ້າທີ່ວຽກງານຂອງຕົນທີ່ຂັ້ນເທິງມອບໝາຍໃຫ້. ສຳລັບແຜນການໃນເດືອນຕໍ່ໄປແມ່ນສືບຕໍ່ປະຕິບັດຕາມແຜນຂອງແຕ່ລະຂະແໜງການທີ່ວາງໄວ້ໃຫ້ບັນລຸຕາມຄາດໝາຍ ແລະ ສຳຫຼວດກວດກາ ສະຫຼຸບລາຍງານປະຈຳອາທິດ ປະຈຳເດືອນໃຫ້ເປັນປົກກະຕິ.

  ໂອກາດດັ່ງກ່າວ ທ່ານຫົວໜ້າພະແນກສຶກສາ-ກິລາແຂວງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ຂອງການປະຕິບັດວຽກງານຜ່ານມາ. ທ່ານຍັງເນັ້ນໃຫ້ພະນັກງານທຸກທ່ານ ຊ່ວຍກັນເປັນເສນາທິການທີ່ດີ ພ້ອມກັນຮັບສາຄວາມສາມັກຄີທັງພາຍໃນ ແລະ ພາຍນອກ ເຮັດວຽກຢ່າງມີແບບແຜນ, ມີການແບ່ງວຽກຄວາມຮັບຜິດຊອບ ຕາມຂັ້ນເທິງມອບໝາຍ ແລະ ຊ່ວຍກັນຮັກສາສິ່ງຂອງສ່ວນລວມກໍ່ຄືຊັບສົມບັດຂອງຊາດໃຫ້ເກີດປະໂຫຍດສູງສຸດ.

 

 ໂດຍ: ພູວອນ ດຳລົງບຸນ