ພະແນກສຶກສາທິການ ແລະ ກິລາແຂວງສະຫວັນນະເຂດ

ສະຫວັນນະເຂດ ຈັດພິທີສະເຫຼີມສະຫຼອງວັນລ້າງມືສາກົນຄົບຮອບ 9 ປີ

  ໃນວັນທີ 13 ຕຸລາຜ່ານມາ ທີ່ໂຮງຮຽນປະຖົມບ້ານແກ້ງຄຶບ ເມືອງເຊໂປນ ແຂວງສະຫວັນນະເຂດ ໄດ້ມີພິທີສະເຫຼີມສະຫຼອງວັນລ້າງມືສາກົນ ຄົບຮອບ 9 ປີ (15 ຕຸລາ 2008- 15 ຕຸລາ 2017) ເຂົ້າຮ່ວມເປັນປະທານຂອງ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ທ່ານ ປອ ມີທອງ ສຸວັນມີໄຊ ຫົວໜ້າກົມການສຶກສາກ່ອນໄວຮຽນ, ມີບັນດາທ່ານຫົວໜ້າພະແນກສຶກສາ-ກິລາ, ຮອງເຈົ້າເມືອງ,ແຂກຖືກເຊີນ ພະນັກງານ-ຄູທີ່ກ່ຽວຂ້ອງ ພ້ອມດ້ວນພໍ່ແມ່ປະຊາຊົນ ແລະ ນ້ອງນັກຮຽນເຂົ້າຮ່ວມ.

  ທ່ານນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ ໄດ້ກ່າວປະຫວັດຄວາມເປັນມາຂອງວັນລ້າງມືສາກົນໃຫ້ຮູ້ວ່າ: ວັນລ້າງມືສາກົນໄດ້ຈັດຂຶ້ນໃນໄລຍະສັບປະດານ້ຳໂລກ ລະຫວ່າງວັນທີ 17 ຫາ 23 ສິງຫາ 2008 ທີ່ນະຄອນຫຼວງສະຕ໋ອກໂຮມ ປະເທດສະວີເດັນ ຖືເປັນເຫດການທາງປະຫວັດສາດໂລກ ທີ່ໄດ້ມີການລິເລີ່ມກັນລະຫວ່າງພັກລັດ ແລະ ເອກະຊົນເພື່ອສ້າງຂະບວນການລ້າງມື. ວັນລ້າງມືສາກົນຄັ້ງທຳອິດໄດ້ຖືກຈັດຂຶ້ນໃນວັນທີ 15 ຕຸລາ 2008 ຊຶ່ງໄດ້ຮັບການແຕ່ງຕັ້ງໂດຍປະທານສະຫະປະຊາຊາດ ແລະ ຍັງເປັນປີສາກົນທາງດ້ານສຸຂະພິບານອີກດ້ວຍ ຈຸດປະສົງເພື່ອເພີ່ມຄວາມຮູ້ ແລະ ຄວາມເຂົ້າໃຈກ່ຽວກັບຄວາມສຳຄັນຂອງວັນລ້າງມືໃສ່ສະບູ ເຊິ່ງເປັນວິທີປ້ອງກັນພະຍາດທີ່ມີປະສິດທິພາບ ແລະ ມີຄ່າໃຊ້ຈ່າຍໜ້ອຍທີ່ສຸດ ເພາະມັນສາມາດປ້ອງກັນພະຍາດຖອກທ້ອງ ແລະ ພະຍາດທາງເດີນຫາຍໃຈ ແຕ່ລະປີມີເດັກນ້ອຍທົ່ວໂລກປະມານ 3,5 ລ້ານຄົນເສຍຊີວິດຈາກພະຍາດດັ່ງກ່າວ

  ດັ່ງນັ້ນ, ສກຂ ສະຫວັນນະເຂດ ໄດ້ແຈ້ງການເຖິງຫ້ອງການສຶກສາທິການ ແລະ ກິລາເມືອງທັງ 15 ເມືອງ, ໂຮງຮຽນປະຖົມທຸກແຫ່ງສ້າງກິດຈະກຳລ້າງມືໃສ່ສະບູ ໃຫ້ເປັນຂະບວນ. ສຳລັບໂຮງຮຽນປະຖົມບ້ານແກ້ງຄຶບ ຖືເປັນສັນຍາລັກໃນການສະເຫຼີມສະຫຼອງຢ່າງເປັນທາງການຂອງແຂວງສະຫວັນນະເຂດ. ໂດຍໂຮງຮຽນດັ່ງກ່າວໄດ້ຮັບການຊ່ວຍເຫຼືອຈາກອົງການຢູນິເຊັບ ໃນການສ້າງຫ້ອງນ້ຳ, ລະບົບນ້ຳ, ອ່າງລ້າງມື ແລະ ເຄື່ອງກອງນ້ຳ ຊື່ງຖືວ່າມີຄວາມສຳຄັນ, ພາຍໃນ 3 ປີຜ່ານມາອົງການຢູນິເຊັບ ໄດ້ຊ່ວຍເຫຼືອດ້ານສຸຂະອະນາໄມພາຍໃນໂຮງຮຽນ ປະຖົມແຂວງສະຫວັນນະເຂດ ລວມທັງໝົດ 85 ແຫ່ງ ໂດຍການສ້າງວິດຖ່າຍທີ່ມີມາດຕະຖານ ແລະ ສະໜອງອຸປະກອນຕ່າງໆທີ່ຈຳເປັນໃຫ້ແກ່ໂຮງຮຽນເຊິ່ງວ່າເປັນການຊ່ວຍເຫຼືອທີ່ມີຄຸນປະໂຫຍດຢ່າງຫຼວງຫຼາຍ.

  ໂອກາດດັ່ງກ່າວ ທ່ານຮອງເຈົ້າແຂວງ ຍັງໄດ້ຍົກໃຫ້ເຫັນຄວາມສຳຄັນຂອງການລ້າງມືໃສ່ສະບູ, ການຮັກສາອະນາໄມ 3 ສະອາດ ມັນສາມາດປັບປຸງ ປ່ຽນແປງພຶດຕິກຳ ໃນການດຳລົງຊີວິດຕົວຈິງໃຫ້ດີຂຶ້ນ ດັ່ງຄຳເວົ້າທີ່ວ່າ: (ມືສະອາດອະນາຄົດສົດໃສ). ທ່ານຍັງເນັ້ນໃຫ້ທຸກພາກສ່ວນ ຮ່ວມມືກັນລະຫວ່າງ ຂະແໜງການສຶກສາ ແລະ ຂະແໜງສາທາລະນະສຸກ ຊ່ວຍກັນລົງຊຸກຍູ້ຕິດຕາມ ໃຫ້ຊຸມຊົນເຂົ້າໃຈເຖິງຄວາມສຳຄັນຂອງການລ້າງມືກ່ອນກິນອາຫານ ແລະ ຫຼັງການໃຊ້ວິດຖ່າຍທຸກໆຄັ້ງ ເພື່ອກາຍເປັນນິໃສ ແລະ ເກີດເປັນຄວາມຊິນເຄີຍ.

 ໂດຍ: ພູວອນ ດຳລົງບຸນ