ພະແນກສຶກສາທິການ ແລະ ກິລາແຂວງສະຫວັນນະເຂດ

ສະຫະພັນກິລາດອກປີກໄກ່ແຂວງ ຈັດແຂ່ງຂັນກິລາດອກປີກໄກ່ 4 ຮຸ່ນ ຊີງຂັນທ່ານເຈົ້າແຂວງ

  ສະຫະພັນກິລາດອກປີກໄກ່ແຂວງ ຮ່ວມກັບພະແນກສຶກສາທິການ ແລະ ກິລາແຂວງສະຫວັນນະເຂດຈັດແຂ່ງຂັນກິລາດອກປີກໄກ່ອອກເປັນ 4 ຮຸ່ນ ຊີງຂັນເຈົ້າແຂວງສະຫວັນນະເຂດ ພ້ອມນັ້ນ, ກໍ່ເປັນການຕ້ອນຮັບວັນຊາດທີ່ 2 ທັນວາ ຄົບຮອບ 42 ປີ ແລະ ທັງເປັນການຄັດເລືອກຕົວນັກກິລາທີ່ດີເດັ່ນ ເຂົ້າຮ່ວມງານກິລາແຫ່ງຊາດຄັ້ງທີ 11 ທີ່ແຂວງຊຽງຂວາງ

  ການແຂ່ງຂັນກິລາດັ່ງກ່າວໄດ້ມີຂຶ້ນໃນວັນທີ 18 ພະຈິກ ຜ່ານມາທີ່ສະໜາມກິລາດອກປີກໄກ່ແຂວງ ໂດຍການຮ່ວມເຂົ້າຮ່ວມເປັນປະທານຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີບັນດາທ່ານຄະນະນັກກິລາແຕ່ລະຮຸ່ນທັງຍິງ ແລະ ຊາຍເຂົ້າຮ່ວມຢ່າງພ້ອມພຽງ.

  ທ່ານ ສົມຈິດ ລາດຊະວົງ ປະທານສະຫະພັນກິລາດອກປີກໄກ່ ແຂວງສະຫວັນນະເຂດ ກ່າວໃຫ້ຮູ້ວ່າ: ການຈັດແຂ່ງຂັນກິລາດອກປີກໄກ່ຊີງຂັນທ່ານເຈົ້າແຂວງສະຫວັນນະຂດ ໃນຄັ້ງນີ້ ເພື່ອເປັນການສ້າງຂະບວນການຂ່ຳນັບຮັບຕ້ອນ ວັນຊາດທີ 2 ທັນວາ ຄົບຮອບ 42 ປີ ( 2 ທັນວາ 1975 – 2 ທັນວາ 2017) ທັງເປັນການຄັດເລືອກເອົານັກກິລາທີ່ມີພອນສະຫວັນ, ນັກກິລາທີ່ຫຼິ້ນໄດ້ໂດດເດັ່ນ ເຂົ້າມາຝຶກຊ້ອມ ເພື່ອເປັນຕົວແທນນັກກິລາດອກປີກໄກ່ແຂວງ ກຽມເຂົ້າຮ່ວມແຂ່ງຂັນງານມະຫາກຳກິລາແຫ່ງຊາດ ຄົ້ງທີ 11 ທີ່ແຂວງຊຽງຂວາງເປັນເຈົ້າພາບ ໃນທ້າຍປີ 2018 . ສຳລັບການແຂ່ງຂັນແມ່ນຈັດເປັນແບ່ງເປັນສາຍ ຄັດເລືອກເອົາຄູ່ທີ່ຊະນະເຂົ້າຮອບຕໍ່ໄປ ເຊິ່ງມີທັງໝົດ 4 ຮຸ່ນຄື: ຮຸ່ນອາວຸໂສທົ່ວໄປ ອາຍຸແຕ່ 32 ປີຂຶ້ນໄປ ມີ 2 ຮຸ່ນຈຳນວນ 24 ຄູ່, ຮຸ່ນຊາວໜຸ່ມທົ່ວໄປ ອາຍຸ 19 ປີ ຫາ 31 ປີ ມີ 8 ຄູ່, ຮຸ່ນເຍົາວະຊົນ ອາຍຸແຕ່ 14 ຫາ 18 ປີ ມີ 8 ຄູ່ ແລະ ຮຸ່ນເພດຍິງທົ່ວໄປ (ບໍ່ຈຳກັດອາຍຸ) ມີ 13 ຄູ່ ນອກນັ້ນ, ຍັງມີຮຸ່ນອາວຸໂສກິຕິມະສັກເຂົ້າຮ່ວມຕື່ມອີກ

 

 ໂດຍ: ພູວອນ ດຳລົງບຸນ