ພະແນກສຶກສາທິການ ແລະ ກິລາແຂວງສະຫວັນນະເຂດ

ຂະແໜງການສຶກສານອກໂຮງຮຽນສະຫຼຸບວຽກງານປະຈຳປີ 2017 ແລະ ວາງແຜນການໃນຕໍ່ໜ້າ

  ໃນວັນທີ 21 ພະຈິກ ຜ່ານມາທີ່ຫ້ອງປະຊຸມພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ມີກອງປະຊຸມສະຫຼຸບການຈັດຕັ້ງປະຕິບັດການສຶກສານອກໂຮງຮຽນປະຈຳສົກຮຽນ 2016-2017 ແລະ ແຜນການປີ 2017-2018 ຂອງຂະແໜງການສຶກສານອກໂຮງຮຽນ ໂດຍເປັນປະທານຂອງ ທ່ານ ຄູນຄຳ ຣາຊະພົນ ຮອງຫົວໜ້າພະແນກສຶກສາທິການ ແລະ ກິລາແຂວງ, ເຂົ້າຮ່ວມໂດຍ ທ່ານ ປອ ກ້າ ສະເລີມສຸກ ຫົວໜ້າກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ, ມີບັນດາທ່ານຄະນະຫ້ອງການສຶກສາ-ກິລາ ພ້ອມດ້ວຍຜູ້ຮັບຜິດຊອບວຽກງານການສຶກສານອກໂຮງຮຽນທັງ 15 ເມືອງເຂົ້າຮ່ວມຢ່າງພ້ອມພຽງ.

  ທ່ານ ຈັນທອນ ໄຊຍະແສງ ໄດ້ລາຍງານໃຫ້ຮູ້ວ່າ: ການພັດທະນາການສຶກສານອກໂຮງຮຽນປະຈຳປີ 2017 ແມ່ນການປະຕິບັດຕາມແຜນຍຸດທະສາດການສຶກສາແຫ່ງຊາດ ຄັ້ງທີ VIII (2016-2020) ເຊິ່ງແມ່ນການສືບຕໍ່ວຽກງານ ບຳລຸງຍົກລະດັບການສຶກສາໃຫ້ປະຊາຊົນໃນເກນອາຍຸ 15-30 ປີ ຈົບຊັ້ນມັດທະຍົມຕອນຕົ້ນ ພ້ອມທັງຈັດຕັ້ງການຍົກລະດັບການສຶກສາຂັ້ນມັດທະຍົມຕອນປາຍ ໃຫ້ພະນັກງານທະຫານຕຳຫຼວດ ປະຊາຊົນຊາວໜຸ່ມທົ່ວໄປ ແລະ ຈັດຝຶກອົບຮົມທັກສະຊີວິດຂັ້ນພື້ນຖານໃຫ້ປະຊາຊົນ ຄວບຄູ່ກັບການຝຶກອົບຮົມວິຊາຊີບ ແນ່ໃສ່ເຮັດໃຫ້ຄຸນະພາບຊີວິດຂອງປະຊາຊົນດີຂຶ້ນ. ເຊິ່ງໃນປັດຈຸບັນສາມາດປະກາດຈົບຊັ້ນມັດທະຍົມຕອນຕົ້ນໄດ້ 81 ເມືອງ, 8 ແຂວງ, 1 ນະຄອນຫລວງວຽງຈັນໃນທົ່ວປະເທດ ສະເພາະດແຂວງສະຫວັນນະເຂດ ປະກາດໄປແລ້ວ 7 ເມືອງຄື: ເມືອງໄກສອນ ພົມວິຫານ, ໄຊບູລີ, ໄຊພູທອງ, ສອງຄອນ, ວິລະບູລີ, ຈຳພອນ ແລະ ເມືອງອຸທຸມພອນ ແລະ ຍັງຢູ່ໃນຂັ້ນຕອນນຳສະເໜີວິຊາການຈາກກະຊວງລົງປະເມີນ 2 ເມືອງຄື: ເມືອງອາດສະພັງທອງ ແລະ ເມືອງຊົນນະບູລີ. ສຳລັບແຜນພັດທະນາການສຶກສານອກໂຮງຮຽນປະຈຳປີ 2018 ແມ່ນແນ່ໃສ່ພັດທະນາການຮຽນ-ການສອນປະຖົມເລັ່ງລັດໃຫ້ແກ່ເດັກກຸ່ມເປົ້າໝາຍ 6-14 ປີທີ່ດ້ອຍໂອກາດ ປະລະການຮຽນກ່ອນຈົບປະຖົບ ແລະ ກຸ່ມເປົ້າໝາຍ 15-40 ປີ ທີ່ບໍ່ຮູ້ໜັງສື ແລະ ບໍ່ໍ່ຈົບປະຖົມ, ບຳລຸງຍົກລະດັບການສຶກສາຂັ້ນມັດທະຍົມຕອນຕົ້ນໃຫ້ປະຊາຊົນໃນກຸ່ມເປົ້າໝາຍ 15-30 ປີ ຈຳນວນ 2,589 ຄົນ, ຍິງ 1,181 ຄົນໃຫ້ສຳເລັດຕາມແຜນການ ແລະ ສືບຕໍ່ຈັດຕັ້ງການຮຽນ-ການສອນບລຸງມັດທະຍົມຕອນຕົ້ນຢ່າງເປັນຈຸດສຸມ ໃຫ້ແກ່ປະຊາຊົນກຸ່ມເປົ້າໝາຍ ໃນ 8 ເມືອງທີ່ຍັງບໍ່ສຳເລັດການບຳລຸງຈົບມໍຕົ້ນໃຫ້ສຳເລັດຕາມແຜນການໃນປີ 2020.

 

 

 ໂດຍ: ພູວອນ ດຳລົງບຸນ